Топ эдвайзерлерімен кездесу ұйымдастырылды

2024 жылдың 30 қазанында Абай атындағы ҚазҰПУ Психологиялық қолдау қызметінің ұйымдастыруымен «Қазіргі білім беру жағдайындағы студенттердің психологиялық жағдайы» тақырыбында топ эдвайзерлерімен кездесу өтті. Кездесуге университетіміздің 7 факультетінен және 1 институтынан 30-ға жуық топ эдвайзерлері қатысты.

Кездесудің мақсаты - студенттер арасында суицидтік тәуекелді және бірінші курстардың студенттік өмірге бейімделу деңгейін анықтауға арналған психологиялық диагностика нәтижесімен бөлісу.

Кездесу барысында Психологиялық қолдау қызметінің мамандары қазан айында 1-курс студенттерінен алынған сауалнама нәтижелерінің статистикалық мәліметтерімен бөлісіп, студенттердің психологиялық жағдайын бағалау және оны жақсарту бойынша ұсыныстар берді.

Кездесу студенттердің психологиялық жағдайы туралы ақпарат алмасу және оны жақсартуға бағытталған тиімді шара болды. Психологиялық қолдау қызметінің мамандары топ эдвайзерлерімен бірлесіп, студенттердің психологиялық денсаулығын қамтамасыз ету үшін тығыз байланыста жұмыс жасауға шақырды.

Психологиялық қолдау қызметі