Диссертациялық кеңестің қорғау алды отырысы

2024 жылдың 4 қарашасында Абай атындағы ҚазҰПУ «8D012 - Мектепке дейінгі тәрбиелеу және оқыту педагогикасы» (6D010100 - Мектепке дейінгі оқыту және тәрбиелеу) бағыты бойынша философия докторы (PhD) дәрежесін беру және қорғау бойынша Диссертациялық кеңестің мәжілісі өтті. Күн тәртібінде Айдын Қожагұловтың «Болашақ мектепке дейінгі ұйым педагогтерінің кәсіби құзыреттілігін арт-технологиялар арқылы дамыту» тақырыбындағы докторлық диссертациясын қорғауға жіберу мәселесі қаралды. Қорғаушының отандық ғылыми кеңесшілері - педагогика ғылымдарының докторы, профессор Берікжан Әлмұхамбетов, философия докторы (PhD), қауымдастырылған профессор м.а. Анар Алимбекова. Ал, шетелдік кеңесші - философия докторы (PhD), Вильнюс қаласындағы Өнер академиясының (Литва) қауымдастырылған профессоры Даля Рамут Каратажиен.

Диссертациялық кеңес жұмысына кафедра меңгерушісі, педагогика ғылымдарының кандидаты, профессор Ұлбосын Қыяқбаева және Диссертациялық кеңестің жаңа құрамы қатысты: Диссертациялық кеңес төрағасы, педагогика ғылымдарының докторы, профессор Роза Бекмагамбетова, төраға орынбасары, Қазақстан Республикасы Президенті Іс Басқармасы Медициналық орталығының «Қарлығаш» балабақшасы РМК директоры, педагогика ғылымдарының кандидаты, доцент Гүлшат Онланбекқызы, кеңес мүшесі, PhD доктор, қауымдастырылған профессор Гулбану Абитова және ғылыми хатшы, PhD доктор, қауымдастырылған профессор м.а. Асем Булшекбаева.