«Тәуелсіздік – бабам берген аманат» іс-шарасы

2024 жылдың 12 желтоқсанында академик Т.С. Садықов атындағы жаңа және қазіргі заман тарихы кафедрасының «8D01601 - Тарих» білім беру бағдарламасының 1 курс докторанты Ғазиза Байдылда мен ғылыми кеңесші, тарих ғылымдарының кандидаты, профессор Жұмахан Нұрманбетқызының ұйымдастыруымен Алматы қаласы Жетісу ауданындағы №148 мектеп-гимназияда «Тәуелсіздік - бабам берген аманат» тақырыбында ауқымды іс-шара өткізілді. №148 мектеп-гимназия докторанттың диссертациялық ғылыми-зерттеуінің базасы болып табылады.

Іс-шараның негізгі мақсаты - оқушылардың Қазақстан тарихы туралы танымдарын кеңейту, ұлттық сана-сезім мен патриоттық рухты қалыптастыру, тәуелсіздікке жету жолындағы тарихи оқиғалар мен Желтоқсан көтерілісінің маңызын түсіндіру, ел болашағына үлес қосатын саналы, шығармашыл тұлға тәрбиелеу.

Іс-шара Жетісу ауданына қарасты 112 мектептің мұғалімдерінің белсенді қатысуымен және №148 мектеп-гимназияның жаңа ғимаратының ашылуымен тұспа-тұс өтті.

Іс-шарада профессор Жұмахан Нұрманбетқызы мектеп оқушыларына тәуелсіздіктің маңыздылығы туралы тағылымды әңгіме өрбітті. Тәуелсіздік жолындағы ата-бабаларымыздың ерлігіне тоқталып, Желтоқсан оқиғасының тарихи маңызы мен одан алынған сабақтар туралы жан-жақты түсіндірді. Сонымен қатар, оқушыларды еліміздің болашағына жауапкершілікпен қарауға, білімді, саналы азамат болуға шақырды. Жұмахан Нұрманбетқызының әсерлі сөздері оқушылардың бойында патриоттық сезімін оятып, үлкен ой салды.

Бағдарлама барысында 8-9 сынып оқушылары «Азаттық үшін күрес» атты қойылым қойып, қазақ халқының тәуелсіздік жолындағы тарихи кезеңдерін бейнеледі. «Тәуелсіздік деп соғады жүрегіміз» атты өлеңдер оқылып, Ахмет Жұбановтың «Қарлығаш» шығармасы жетіген, қобыз, домбыра аспаптарымен орындалды. Сондай-ақ ән мен би өнері көрермен назарына ұсынылды.

Қорытынды бөлімде қонақтар - ҚР еңбек сіңірген қайраткері, «Құрмет» орденінің иегері, Мұхтар Әуезов атындағы Қазақ мемлекеттік академиялық драма театрының актері Бахтияр Қожа және кино және театр актрисасы, Қазақстан Жастар Одағы сыйлығының иегері, ҚР еңбек сіңірген қайраткері Шынар Мұханқызы оқушылармен еркін сұхбат жүргізіп, олардың шығармашылық қабілеттеріне бағыт-бағдар беріп, ізгі тілектерін жеткізді.

Іс-шара соңында мектеп ұжымы болашақ педагог-тарихшыларды даярлап, білікті мамандар қатарына қосып жүрген профессор Жұмахан Нұрманбетқызына ерекше алғысын білдірді. Ұжым өкілдері осындай тәрбиелік және танымдық мәні зор шаралардың маңыздылығын атап өтіп, алдағы уақытта да ынтымақтастықты жалғастыруға ниет білдірді.

Іс-шара өз мақсатына жетіп, оқушылардың тарихқа деген қызығушылығын арттыруда, тәуелсіздік құндылығын терең ұғындыруда маңызды рөл атқарды. Алдағы уақытта осындай игі бастамалар жалғасын табады деп күтілуде.