Абай университетінің оқытушылары «Жоғары оқу орнының үздік оқытушысы - 2024» атағына ие болды

Республикалық конкурстық комиссия кәсіпқойлық пен ғылыми талантты танудың нағыз мерекесіне айналған «ЖОО - ның үздік оқытушысы - 2024» жыл сайынғы конкурсы жеңімпаздарының есімдерін жариялады. Биылғы жылы құрметті атақ үшін Қазақстанның 90 жетекші жоғары оқу орнынан 946 көрнекті оқытушы бақ сынасты.

Абай университетінің екі оқытушысы - педагогика ғылымдарының докторы, профессор  Марфуга Абсатова (Жоғары оқу орнының үздік оқытушысы - 2012, 2024) және PhD, постдокторант Нурбол Усенов «Жоғары оқу орнының үздік оқытушысы - 2024» атағына ие болды. Оқытушылардың ғылыми еңбектері өз қызметі саласында үздік деп танылды.

Бағалау критерийлеріне электрондық оқу ресурстарын әзірлеу және жариялау, отандық және халықаралық журналдардағы ғылыми жарияланымдар, өнертабыстарға патенттер және басқа да жетістіктер кірді. Сондай-ақ білім берудің барлық деңгейлерінде - бакалавриаттан докторантураға дейін - оқыту сапасы мен мамандарды даярлауға қосқан үлесі де бағаланды. 

Жыл сайынғы ЖОО үздік оқытушыларын іріктеуге арналған конкурс оқытушылардың кәсіби өсуін қолдауға және ынталандыруға, олардың кәсібінің беделін арттыруға бағытталған. Ақшалай ынталандырудан басқа, жеңімпаздар білім мен ғылымдағы жоғары жетістіктері үшін лайықты төсбелгі иеленеді.