«Жақсылық жолымен» қайырымдылық акциясы

2024 жылдың 28 қарашасы мен 29 қарашасына дейін Әлеуметтік және жастар саясаты жөніндегі департаментінің қолдауымен қауымдастырылған, профессор Гулбахира Ширинбаеваның жетекшілігімен «Мейірім» клубының әлеуметтік-педагогикалық бағыты бойынша «6В01801-Әлеуметтік педагогика», «6В01201-Мектепке дейінгі оқыту және тәрбиелеу», «6В04205-Халықаралық құқық», «6В05301-Химия (ғылыми)», «6В01507-Информатика» мамандықтарының ерікті-студенттері «Жақсылық жолымен» қайырымдылық жәрмеңкесін өткізді.

Қайырымдылық шараның мақсаты - Алматы қаласындағы «ЕРЗИ» әлеуметтік-оңалту орталығындағы мүмкіндігі шектеулі жандарға қажетті тренажерлерді сатып алуға және 42 жастағы Қамшыбек Койчугуловтың Қытай елінде ем алуына (омыртқаның ауыр жабық жарақаты) қаражат жинау үшін әлеуметтік-педагогикалық қолдау және қаржылық көмек көрсету.

Іс-шараға Педагогика және психология факультетінің мектепке дейінгі білім беру және әлеуметтік педагогика кафедрасының меңгерушісі Ұлбосын Қыяқбаева, Жаратылыстану және география факультетінің деканы Күләш Каймулдинова, Өнер факультеті деканының тәрбие ісі жөніндегі орынбасары Айдын Қожағұлов, Жаратылыстану және география, Филология және Өнер факультеттерінің профессор-оқытушылар құрамы мен студенттер белсене қатысты.

«Мейірім» еріктілер клубы барлық мейірімді адамдарға шын жүректен алғыс білдіреді. Бізбен бірге болғаныңызға және мұқтаж адамдарға көмектесуге мүмкіндік бергеніңізге көп рахмет!

«Мейірім» еріктілер клубы