«Поэзия ‒ әлем жүрегі»

Қазақтың көрнекті ақыны, аудармашы, Абай атындағы ҚР Мемлекеттік сыйлығының лауреаты, «Парасат», «Құрмет» ордендерінің иегері Ғалым Жайлыбай және Абай атындағы ҚазҰПУ орыс тілі мен әдебиеті кафедрасының аға оқытушысы, жазушы, драматург, әдебиеттанушы-ғалым, алаштанушы, «Жас ғалым» (2025-2027 ж.) жобасының жетекшісі, Алматы қаласы әкімінің стипендиаты, Қазақстан Республикасының Президенті Қасым-Жомарт Тоқаев тағайындаған «Алтын барыс» төсбелгісінің иегері Әлібек Байбол Грузиядағы «Поэзия ‒ әлем жүрегі» атты халықаралық әдеби фестивальда Шота Руставели атындағы алтын медальмен марапатталды.

Сыйлық Ғалым Жайлыбайға Грузия Жазушылар одағының Төрайымы, Шота Руставели атындағы Грузия Мемлекеттік сыйлығының иегері, ақын, «Грузин жырының амазонкасы» атанған Маквала Гонашвилидің аудармасымен жарық көрген жыр жинағы және екі ел арасындағы әдеби-мәдени байланыс орнатқаны үшін, ал Әлібек Байболға ҚР Мәдениет және ақпарат министрлігі және Қазақстан Жазушылар одағының «ТМД ЕЛДЕРІНІҢ АРХИВТЕРІНДЕГІ ҚАЗАҚСТАНДЫҚ ЖАЗУШЫЛАРДЫҢ ЗЕРТТЕУ ЖҰМЫСТАРЫ» делінген ортақ жобасы аясындағы «Тифлистегі қаламгерлер тағдыры» (Қазақстан мен Грузияның әдеби-мәдени байланыстары хақындағы миниатюралық-хроникалық эсселер, 1930-1938 ж.) атты кітабы үшін табысталды.

6 мамыр күні Ғалым Жайлыбай жыр кітабының таныстырылымы әрі шығармашылық кеші Тбилисидегі Достық үйінде өте жоғары деңгейде өтті. 5-10 мамыр аралығындағы халықаралық әдеби форумға Италия, Израиль, Грузия, Армения, Түркия, Қазақстан, Латвия, Германия, т.б. жиырмаға тарта елдің белгілі ақын-жазушылары, әдебиетшілері қатысты. Делегаттар Тбилисиден бөлек, Мцхета, Кахети, Кварели, Цинандали, Телави, Рустави секілді қалаларды және тарихи жерлерді тамашалады. Сонымен қатар, Арменияның ұлттық ақыны Ованес Туманянның және биыл туғанына 240 жыл толып отырған гүржінің ұлы ақын-романтигі, орыс императорлық армиясының генерал-лейтенанты, мемлекет және қоғам қайраткері Александр Чавчавадзенің мұражай-үйін, Манави қамалын, Картли-Кахетия аймағын, Гүржістанның ұлы пашасы Ираклий II резиденциясын аралаған-ды. Бұл айтулы фестивальды Грузия Жазушылар одағының Төрайымы, Шота Руставели атындағы Грузия Мемлекеттік сыйлығының лауреаты Маквала Гонашвили және білікті әдебиетші, фестиваль координаторы, арт-менеджер Манана Горгишвили ұйымдастырған.