NIIED делегациясының Абай атындағы ҚазҰПУ-ға сапары

2025 жылғы 20 қарашада Абай атындағы Қазақ ұлттық педагогикалық университетіне Корея Республикасының Білім және ғылым министрлігіне қарасты Халықаралық білім беру ұлттық институтының (NIIED - National Institute for International Education) делегациясы ресми сапармен келді. Сапар 2021 жылы екі тарап арасында қол қойылған өзара түсіністік туралы Меморандум аясында жүзеге асырылды.

Кездесу барысында делегация өкілдері университетке NIIED тарапынан жіберілген корей тілі мұғалімі-волонтердің жұмыс жағдайымен танысып, корей тілін меңгеріп жүрген 3–4 курс студенттерімен сұхбат жүргізді. Сонымен қатар, ынтымақтастықтың қазіргі бағыттары талқыланды.

Делегация құрамында Корея Республикасының Қазақстандағы Елшілігі жанындағы Алматы қаласындағы Корея білім беру орталығының басшылығы да болды. Университет тарапынан кездесуге факультет деканы Оспанов Е.Т., кафедра меңгерушісі Абдрахманова К.Х.,халықаралық ынтымақтастық департаментінің өкілдері және корей тілі оқытушылары қатысты. Келіссөздер барысында Абай университетінің корей тіліне деген қызығушылықтың артуына байланысты волонтер-мұғалімдердің санын көбейту, сондай-ақ университет кітапханасын заманауи корей тіліндегі оқулықтармен және оқу құралдарымен толықтыру мүмкіндігін қарастыру жөнінде ұсыныс білдірді.

Бұл сапар Қазақстан мен Корея арасындағы екіжақты академиялық ынтымақтастықты одан әрі дамытуға және гуманитарлық байланыстарды тереңдетуге деген ортақ мүддені растады.