Ұлттың ұлы ұстазы

2022 жылдың 27-28 қараша күндері Абай атындағы Қазақ ұлттық педагогикалық университетінде Педагогика және психология институты мектепке дейінгі білім беру және әлеуметтік педагогика кафедрасының ұйымдастыруымен Ұлт ұстазы А. Байтұрсынұлының туғанына 150 жыл толуына орай «Ахмет Байтұрсынұлының педагогикалық мұрасы, заманауи білім мәселелері: бүгіні мен болашағы» халықаралық ғылыми-практикалық конференциясы өткізілді.

Конференция жұмысы:

1. Ахмет Байтұрсынұлы - ұлы тұлға және ұлт мұрасы;

2. А.Байтұрсынұлының педагогикалық мұрасы: өткені мен бүгіні;

3. Заманауи білім беруді дамытудың негізгі тенденциялары;

4. Ұлттық құндылықтар: оқыту мен тәрбиелеудің өзекті мәселелері бағыттары бойынша өтті.

Конференцияның модераторы мектепке дейінгі білім беру және әлеуметтік педагогика кафедрасының меңгерушісі Ұ.Қ Қыяқбаева болды.

Конференцияның салтанатты ашылуын Абай атындағы ҚазҰПУ Басқарма төрағасы-ректор Дархан Біләлов құттықтау сөзімен бастап, конференция жұмысына сәттілік тіледі. Сондай-ақ Педагогика және психология институтының директоры Г.А.Абаева және ҚР Ғылым және жоғары білім министрлігінің Тіл саясаты комитетінің бас маманы А.Қ.Көкен құттықтау сөздерін жолдады.

Конференцияның пленарлық отырысында:

1. «Егемен Қазақстан» РГ Бас директоры, филология ғылымдарының докторы, профессор Диқан Қамзабекұлы «Ұлт ағартушылығы және Ахмет Байтұрсынұлы»;

2. А. Байтұрсынұлы музей - үйінің жетекшісі, ахметтанушы, филология ғылымдарының кандидаты Райхан Имахамбет «Ахмет Байтұрсынұлы мұрасының зерттелуі мен зерделенуі»;

3. Гиресун университетінің Ағылшын және әдебиет бөлімі профессоры, PhD Веди Ашкарұлу (Гиресун қаласы, Түркия) «Ахмет Байтұрсынұлы - зиялы, өнертанушы және мемлекет қайраткері ретінде»;

4. Ферғана мемлекеттік университетінің Мектепке дейінгі білім беру кафедрасының меңгерушісі, PhD Солиев Илхом Собирович «Өзбекстан Республикасының мектепке дейінгі білім беру ерекшеліктері»;

5. Әл-Фараби атындағы ҚазҰУ профессоры, филология ғылымдарының докторы Жұбай Орынай «Бүгінгі жаңа парадигмалардың Байтұрсынұлы еңбектеріндегі көрінісі»;

6. Л.Н Гумилев атындағы ЕҰУ, қазақ әдебиеті кафедрасының профессоры, филология ғылымдарының докторы Сағымбай Ботпайұлы Жұмағұл «Естеліктердегі Ахмет Байтұрсынұлы тұлғасы»;

7. Қазақ-Британ техникалық университетінің профессоры, педагогика ғылымдарының докторы Даулетбекова Жанат Турарбековна «Ахмет Байтұрсынұлы еңбектеріндегі оқытудың іргелі теориялары»;

8. Қазақстан Жазушылар одағының мүшесі, ақын, балаларға арналған «Мөлдір бұлақ» журналының бас редакторы Дәулетбек Байтұрсынұлы «Ел бүгіншіл, менікі ертеңгі үшін;

9. Орал мемлекеттік педагогикалық университетінің (Ресей) профессоры, педагогика ғылымдарының докторы Воронина Людмила Валентиновна «Цифрлық қоғам жағдайындағы заманауи білім»;

10. Абай атындағы ҚазҰПУ-дың бастауыш білім беру кафедрасының меңгерушісі Жұмабаева Әзия Елеупановна «А.Байтұрсынұлы «Әліппелерінің өміршеңдігі»» тақырыптарындағы тағылымды баяндамалар тыңдалып, А. Байтұрсынұлының өмірі мен еңбектеріне қатысты тың мағлұматтармен және танымды ой-пікірлерімен бөлісіп, конференция қонақтары мен қатысушыларының ыстық ықыласына бөленді.

Қазақ-Британ техникалық университетінің профессоры, педагогика ғылымдарының докторы Жанат Даулетбекованың «Ахмет Байтұрсынұлы еңбектеріндегі оқытудың іргелі теориялары» тақырыбындағы және Әл-Фараби атындағы ҚазҰУ профессоры, филология ғылымдарының докторы Жұбай Орынайдың «Бүгінгі жаңа парадигмалардың Байтұрсынұлы еңбектеріндегі көрінісі» тақырыбында жасалынған ғылыми баяндамалары тың деректер арқылы ұлт ұстазы А. Байтұрсынұлының алға қойған басты мақсаттарының бірі де бірегейі ұлт тағдыры мен болашағы, ана тіліміз - қазақ тілінде сөйлеуі үшін атқарған ерен еңбегінің жемісін тілге тиек ете отыра, студенттердің көкірегіндегі ұлтшылдық отының тұтануы мен тілге, елге, Отанға, ұлттық ғылымға деген сүйіспеншіліктері мен патриоттық сезімдерінің оянуына түрткі бола алды.

Конференцияның ашылу салтанатында «Ұлт ұстазы - А.Байтұрсынұлы» кітап көрмесі, ал екінші күні А.Байтұрсынұлының мұражай - үйіне бару және «Біз таланттарды іздейміз» конкурсы ұйымдастырылды.

Конференция ұйымдастырушылары мен қатысушылары аталған іс-шаралар аясында конференцияға қатысушы отандық ғалымдар мен шет елдерден келген ғалым қонақтардың мол ризашылығы мен ыстық ықыластарына бөленді.

Аталған конференция аясында мектепке дейінгі білім беру және әлеуметтік педагогика кафедрасының жетекші ғалым профессорлары мен Өзбекстанның Ферғана қаласы, Ферғана мемлекеттік университетінің ғалым педагогтері арасында ғылыми тәжірибе алмасу мақсатындағы пікір алмасулар және ғылыми еңбектермен бөлісу, соңында естелікке суретке түсу рәсімдері болды.