Факультет тарихы

Қазақстанның жоғары оқу орындарындағы географиялық білім мен ғылымның қалыптасу тарихы, 1933 жылы біздің оқу ордамызда  республикамыздағы ең тұңғыш «география» мамандығы ашылып, оған алғашқы студенттер қабылданудан басталады. Осылайша университетіміз 80 жыл бойы географ-мамандарды даярлауды жүзеге асырып келеді. Сол кезде осы «география» бөлімі «тарих» мамандығымен бірге «тарих және география» факультетінің құрамында болып, ал 1936 жылы олар дербес факультеттерге айналады. Кейіннен 1955-56 оқу жылы жүргізілген ірілендіру саясатына байланысты біздің «геофак», келесі «жаратылыстану» факультетімен біріктіріліп, ендігі жерде  «жаратылыстану-география факультеті» болып аталынады. Еліміздің егемендік алуына байланысты, 1990 жылдардың басында бұрынғы оқу-ағарту жүйелері күрделі реформаларға  ұшырады. Көптеген жоғары оқу орындарының, оның ішінде біздің «қарт ҚазПИ», яғни педагогикалық институтымыздың қайтадан университет (1928 жылы, ол алғашында университет болып ашылған) мәртебесін алуына орай, оның құрылымында үлкен өзгерістер болып, жаңа факультеттер мен кафедралар ашылды. Нәтижесінде, 1991 жылдың қазан айында аталмыш факультет қайтадан «жа­ратылыстану фа­­куль­теті» жә­не «география-эко­логия фа­­куль­теті (ГЭФ)» болып бө­лі­ніп, ГЭФ декандығына академик Ә.С.Бейсенова сайланады. 1999 жылдың сә­уірінде ма­ман­дар даярлау ісін оң­тайландыру мәселесінде олар қайта «жаратылыстану-география факультетіне (ЖГФ)» біріктіріледі. Ал 2008 жылдың шілдесінде ЖГФ студенттерінің жалпы санының көптігінен, әрі оның құрылымдық және кәсіби профильдік мазмұнын сапалық тұрғыда жаңғырту мақсатында, енді ол «химия-биология» және «география-экология» факультеттері болып қайта құрылды.

          Факультетті ұзақ жылдар басқарып, оның қалыптасып дамуына үлкен үлес қосқан декандардың қатарында: академик Ә.С.Бейсенованы, профессорлар: М.Қ.Қалиев пен Н.Б.Молдағұловты, доценттер: П.Д.Устименко мен М.Өтемағанбетовты атауға болады. Факультетте, «география» мамандығының қазақ бөлімін ашуға тікелей атсалысқан, факультет деканы болған - М.Өтемағанбетов пен оның әріптестеріне арналып безендендірілген «атаулы аудитория» бар. Соңғы жылдары факультетті п.ғ.д., профессор - Ж.Б.Шілдебаев басқарса, қазір г.ғ.д., профессор - О.Б.Мазбаев басқаруда.