Абай университетінің профессоры Атырау облысы Қызылқоға ауданының 80 жылдығына арналған мерекелік шараға қатысты

2024 жылдың 24 мен 27 қыркүйегі аралығында Абай атындағы ҚазҰПУ әлем тарихы кафедрасының профессоры Болат Жұмағұлов ғылыми іссапармен Атырау облысында болды. Іссапар барысында профессор Қызылқоға ауданы әкімшілігіне Абай университетінің Басқарма төрағасы-ректор Болат Тілептің құттықтау хатын тапсырды.

Сан ғасырлық тарихы бар Қызылқоға ауданының құрылғанына биыл 80 жыл. Осыған орай ұйымдастырылған мерекелік шараға қатысу үшін «Құрмет» орденінің иегері, Қызылқоға ауданының тумасы Болат Жұмағұловты аудан әкімі Қанат Әзмұханов ресми шақыртқан еді.

Б. Жұмағұлов осы мерейтойлық іс-шаралар аясында ұйымдастырылған «Қазыналы аймақ Қызылқоға: бүгіні мен болашағы» атты ғылыми-тәжірибелік конференция жұмысына қатысып, ғылыми баяндама жасады. Сондай-ақ, «Атырау облысының тарихы. Көне заманнан бүгінге дейін» атты үш тілде жарық көрген 3-томдық академиялық басылымның тұсаукесер рәсімін ұйымдастырды. Кітаптың 5 жиынтық данасы аудан кітапханасына табыс етілді.  Өз кезегінде аудан әкімшілігі Б.Жұмағұловқа ризашылығын білдіріп, Қызылқоға ауданының әлеуметтік-экономикалық дамуына қосқан үлесі үшін «Қызылқоға ауданы - 80 жыл» мерекелік төсбелгісімен марапаттады.