Құрметті ұстаздар қауымы!

Сіздерді кәсіби мерекелеріңіз - Ұстаздар күнімен шын жүректен құттықтаймын!

Ұстаздар - ұрпақ тәрбиелеп қана қоймай, қоғамымызды қалыптастыратын, өскелең ұрпақты отансүйгіштікке, адамгершілік қасиеттерге, білімге және рухани құндылықтарымызды қастерлеуге баулитын мамандықтың төресі. Ұлттың рухани көсемі Ахмет Байтұрсынұлы «Мектептің жаны - мұғалім. Мұғалім қандай болса, мектеп сондай болмақ» деп бекер айтпаған. Бұл сөздер ұстаз миссиясының маңыздылығы мен тереңдігін дәл айқындайды, өйткені жас ұрпақтың тек білім ғана емес, адамгершілік қасиетін қалыптастыру мұғалімге байланысты.

Еліміздегі тұңғыш жоғары оқу орны - Абай атындағы Қазақ ұлттық педагогикалық университеті - ағартушылық және ұстаздық дәстүрді жалғастыратын жоғары білікті педагог мамандарын даярлау ісіне өлшеусіз үлес қосып келе жатқанын ерекше атап өткен жөн. Біз үшін ел ертеңін біліммен қаруландырып, жас ұрпақтың бойына асыл қасиеттерді сіңіріп, олардың жеке тұлға болып қалыптасуына ықпал етіп жүрген ұстаздардың мәртебесін көтеру - ең маңызды міндет. Болашақта жастарымыз Отанға адал қызмет етіп, мемлекетіміздің гүлденуі мен дамуына өлшеусіз үлес қосатынына кәміл сенемін!

Осы ерекше сəтті пайдалана отырып, «Ұстаздық еткен жалықпас, үйретуден балаға» дегендей, шәкірті үшін адамгершіліктің ең жоғарғы үлгісі болып табылатын ұстаздар қауымына шексіз алғысымды білдіремін!

Ел келешегі жас ұрпаққа білім мен тәрбие беру жолындағы еңбектеріңіздің жемісі еселене берсін! Дендеріңізге саулық, жанұяларыңызға береке, шығармашылық жетістіктер тілеймін!

Құрметпен,

ректор Болат Тілеп