Болашақ мұғалімдерге: қазіргі білім беру тенденциялары

2024 жылдың 11 қазанында Абай атындағы ҚазҰПУ-да Teach for Qazaqstan қоғамдық қорымен бірлесе отырып, «Мансап» орталығының жылдық жоспары аясында «Болашақ мұғалімдерге: Қазіргі білім беру тенденциялары» тақырыбында ерекше дәріс өтті. Бұл шараға университеттің болашақ педагогтары мен жас мамандары белсене қатысып, әлемдік деңгейдегі білім беру саласының көшбасшысы, 22 жылдық тәжірибесі бар сарапшы Нұрғали Елшібековтың құнды ақыл-кеңестерін тыңдауға мүмкіндік алды.

Нұрғали Елшібеков - білім беру саласында көптеген беделді мектептерде, оның ішінде БИЛ, НЗМ, НұрОрда, Dostyq, IQanat сияқты оқу орындарында академиялық директор, Вьетнамда Кембридж бағдарламасының координаторы қызметтерін атқарған, халықаралық білім беру стандарттарын енгізу жолында зор үлес қосқан білікті маман. Ол дәрісте білім беру саласындағы жаһандық өзгерістер, қазіргі заманғы тенденциялар және жаңа педагогикалық әдістер жайлы терең ақпарат беріп, болашақ педагогтардың алдында тұрған шексіз мүмкіндіктер туралы шабыттандыра әңгімеледі.

Дәріске қатысушылар болашақ мұғалім ретінде өздері үшін көптеген маңызды ақпарат пен білімге қол жеткізді. Олар білім беру саласында қолданылатын жаңа әдіс-тәсілдерге қанығып, халықаралық деңгейдегі стандарттарға сай келетін кәсіби құзыреттіліктерін нығайтудың маңыздылығын терең түсінді. Нұрғали Елшібековтың баяндамасы түлектердің бойында өздерінің болашақ мансаптық жолдарын айқын көруге деген ұмтылыс пен сенімділік тудырды. Бұл дәріс оларға еңбек нарығында өз орнын табу үшін қажетті дағдылар мен білімді меңгеруге бағытталған бағдар болды.

Кездесу жас мұғалімдер үшін ерекше әсерлі әрі шабыттандырушы оқиғаға айналды. Көптеген қатысушылар дәріс аяқталған соң өздерінің алған әсерлерін бөлісіп, білім беру саласындағы жаңа ашылған мүмкіндіктерге үлкен ықыласпен қарайтындықтарын жеткізді. Бұл дәріс болашақ педагогтар үшін кәсіби даму жолындағы маңызды белес болып, олардың білім беру саласындағы жоғары мақсаттарға жетуіне үлкен серпін берді.