Абай университеті Әзербайжан ұлттық экономикалық университетімен ынтымақтастығын нығайтпақ

Абай атындағы ҚазҰПУ-да Әзербайжан ұлттық экономикалық университетінің делегациясымен кездесу өтті. Делегацияны университет ректоры Адалят Мұрадов Джалал оғлы бастап келді. Ал, кездесуге Абай университетінен академиялық қызмет жөніндегі проректор Бану Нарбекова қатысты. Кездесудің басты тақырыбы - білім және ғылым саласындағы халықаралық ынтымақтастықты кеңейту мүмкіндіктерін талқылау болды.

Кездесу барысында тараптар білім беру бағдарламаларын жүзеге асыру, ғылыми зерттеулер жүргізу тәжірибелерін бөлісіп, бірлескен жобалар мен бастамаларды енгізу мүмкіндіктерін талқылады. Кездесу бағдарламасына студенттер мен оқытушылардың академиялық ұтқырлығы, бірлескен ғылыми конференциялар мен семинарлар өткізу, сондай-ақ ғылыми-әдістемелік ресурстармен алмасу бағыттарын талқылау кірді. Педагогикалық кадрларды даярлау және олардың кәсіби дамуы мәселелеріне ерекше назар аударылды.

Әзербайжан ұлттық экономикалық университетінің ректоры Адалят Мұрадов екіжақты байланыстарды нығайтуға бағытталған ынтымақтастықтың жоғары маңыздылығын атап өтіп, осындай әріптестік қатынастар Әзербайжан мен Қазақстанның жоғары білім беру саласындағы ғылыми әлеуетін дамытуға ықпал ететінін айтты. Ал Абай университетінің академиялық қызмет жөніндегі проректоры Бану Нарбекова әзербайжан әріптестеріне алғысын білдіріп, ұсынылған жоспарларды табысты жүзеге асыруға ниетті екенін білдірді.

Кездесу нәтижесінде академиялық әріптестікті нығайтуға және ғылыми зерттеулерді қолдауға бағытталған бірнеше жобаланы жүзеге асыру туралы келісімдерге қол жеткізілді.

06.11.2024

Ақпарат көзі: turkystan.kz