Профессор-зерттеуші Ақтөбе облысы мемлекеттік архиві қызметкерлерімен кездесу өткізді

«Қазақстанның батыс аймағының әскери тарихы (XVIII-XX ғғ.)» ғылыми жобасының жетекшісі, профессор Болат Жұмағұлов жуырда ғылыми зерттеу жобасының күнтізбелік жоспарына орай архив дереккөздерімен танысып және жинау үшін іссапармен Ақтөбе қаласында болды.  

Осы іссапар барысында 100 жылдан астам тарихы бар облыстық мемлекеттік архвінің қызметкерлерімен кездесіп, ғылыми жобаның мақсаты мен міндеттері туралы сұхбаттасты. Архив қызметкерлері де өз кезегінде ғалымды жылы қабылдады.

Архив директоры Марат Төлебай архивтің қызметі, тыныс-тіршілігі жайлы қызықты ойларымен бөлісті. Қазіргі заман ақпарат заманы болғандықтан әңгіме барысында қоғамның рухани, мәдени дамуындағы негізгі ресурстарының қатарына жататын архивтік құжаттардың электронды архивін құру, қазіргі кездегі облыстағы архив ісінің дамуы мен болашағы, архив саласының жетістіктері мен өзекті мәселелерін тілге тиек етті.

Сонымен қатар ғалымға облыстық архивтің материалдық-техникалық базасын көрсетіп, жұмыс барысымен таныстырды.

Кездесу соңында Болат Жұмағұлов «Атырау облысының тарихы. Көне заманнан бүгінге дейін» атты үш тілде жарық көрген 3-томдық академиялық басылыммен және «1920-1930 жылдардағы Атырау аймағы. Құжаттар мен материалдар жинағы» атты жинақпен таныстырып, кітаптың бір жиынтық данасын архив кітапханасына табыс етті. 

Өз кезегінде архив директоры Марат Төлебай профессор Болат Жұмағұловқа ризашылығын білдіріп, ғылыми жұмысына табыс тіледі.