Кафедра филиалының ынтымақтастық іс - шарасы

2024 жылдың 28 карашасында Абай атындағы ҚазҰПУ Филология факультеті шетел тілдері кафедрасының оқытушылары - Жанар Кулекенова, Шолпан Султанкулова, Алтын Мысекеева, Шырын Акимбекова Қарасай ауданы, Қ. Қошмамбетов атындағы орта мектептің директоры Бақыт Қуанышевамен бірлесе отырып 11 сынып оқушылары арасында ағылшын тілі пәнінен аудандық олимпиада ұйымдастырып, өткізді. Олимпиаданың мақсаты - балалардың болашақ мамандық таңдауында ағылшын тілінің рөлі мен маңыздылығын ұғыну, оқушыларға өз тілдік деңгейлерін сынауға көмектесу және тілге деген кызығушылықтарын арттыру.

Тапсырмаларды кафедра оқытушылары дайындаған тілдік Олимпиада барлығы 4 кезеңнен тұрды. Олимпиада ашылуына аудандық Білім бөлімінің бас әдіскері, мектеп мұғалімдері мен ата аналар катысты. Олимпиада жоспарланған уақыт бойынша 10.00 басталып, 12.30 аяқталды. Тапсырмаларды кафедра окытушылары - п.ғ.к. Жанар Кулекенова, PhD Шырын Акимбекова, магистрлар Шолпан Султанкулова мен Алтын Мысекеева тексеріп, нәтижелерін шығарды. Олимпиада нәтижесі шыққанға дейінгі уақытта қатысушылар және қонақтарға ағылшын тілінде екі мини - спектакль көрсетілді. 

Олимпиада жоғары деңгейде, ашық, объективті түрде өтті. Нәтижеге байланысты сұрақтар мен мәселелер туындамас үшін, тексеріс барысын қатысушылар YouTube желісі арқылы көріп, бақылап отырды.

Төрт кезеңінен тұратын тілдік Олимпиада Қарасай ауданында бірінші рет өткізіліп отыр. Бұл аудандық олимпиада тек мектеп филиалына ғана емес, сондай-ақ шетел тілдері кафедрасы үшін де маңызды болып саналады.