Шағын жинақталған мектептердегі оқу үдерісі: ерекшеліктер мен мүмкіндіктер

2024 жылдың 24 ақпанында Абай атындағы ҚазҰПУ-дың Филология институты шет тілдері кафедрасында шағын жинақталған мектептердің мұғалімдерін кәсіби қолдауға бағытталған «Шағын жинақты мектептердегі білім беру процесі: ерекшеліктері мен мүмкіндіктері» тақырыбында Республикалық вебинар өткізілді. Іс-шараға «Өрлеу» Ұлттық біліктілікті арттыру орталығы мен шет тілдері кафедрасының ынтымақтастығымен, Алматы облысы бойынша біліктілікті арттыру институтының педагог-ғалымдарымен пікір, педагогикалық шеберлікті шыңдау тұрғысында тәжірибе алмасуға шағын жинақталған мектеп мұғалімдері қатысты.

Вебинардың мақсаты - университет пен алыс шалғайда орналасқан мектеп мамандары арасында практикалық байланыс орнату, кәсіби және мәдени қызметті қолдау арқылы өзара түсіністік негізінде білім беру саласындағы ынтымақтастықты дамыту, шалғай аудандарда орналасқан шағын мектептермен байланыс орнату және әдістемелік көмек, ғылыми қолдау көрсету.

Вебинардың міндеттері - шағын жинақты мектептерде білім беру процесін тиімді ұйымдастыру және кәсіби тәжірибені көрсету; педагогикалық практикада жаңа нысандар мен әдістерді қолдану бойынша аталған білім беру ұйымдарының жаттықтырушылары мен оқытушыларының тәжірибесімен алмасу. Қатысушылар-Қызылорда, Алматы және Жетісу облыстарының жалпы білім беретін мектептерінің мұғалімдері, сондай-ақ әдіскерлер, әдіскерлер - ЖОО ғалымдары, сертификатталған коуч-жаттықтырушылар.

Шетел тілдері кафедрасы Қызылорда облысы, Арал ауданының екі шағын жинақталған мектептерімен 2020-2021 оқу жылында екіжақты келісім шартқа отырған болатын. Осы келісімшарт аясында ұйымдастырылған Республикалық вебинар барысы ғылыми баяндамалар мен оқытуға қажетті ақпараттарға, түрлі тәжірибе алмасуларға толы болды. Тренерлердің баяндамалары үлкен қызығушылықпен қабылданды және ұстаздар арасында қызу талқыланды.

Шағын жинақталған мектеп мұғалімдерімен ғылыми-әдістемелік ынтымақтастық әрдайым университеттің назарында болады, ал оларға көрсетілетін әдістемелік қолдау алдағы уақытта да өз жалғасын таппақ.