Ғылым апталығы – 2026: «Психологиядағы ғылыми зерттеу мәдениеті» студенттік ғылыми үйірмесінің нәтижелері ұсынылды!

Абай атындағы Қазақ ұлттық педагогикалық университетінің Педагогика және психология факультеті, Жалпы және қолданбалы психология кафедрасында «Ғылым апталығы - 2026» аясында «Психологиядағы ғылыми зерттеулер мәдениеті: студенттік ортаның тәжірибесі» тақырыбында Journal Club форматындағы ғылыми семинар өтті.
Жиналған қауымға факультет деканының м.а. Ниетбаева Гүлмира Бекенқызы аталған семинардың «Психологиядағы ғылыми зерттеу мәдениеті» студенттік ғылыми үйірмесінің 2025-2026 оқу жылында атқарылған жұмыстарының нәтижелерін таныстыруға арналғанын атап өтті. Үйірме жетекшісі Қайырова Жаңагүл Амантайқызы сөзді жалғастырып, студенттердің оқу жылы барысында жүйелі ғылыми-зерттеу жұмыстарын жүргізіп, олардың нәтижелерін халықаралық және республикалық ғылыми конференцияларда ұсынғанын жеткізді.
Іс-шара 2026 жылдың 6 сәуір күні ұйымдастырылып, оған кафедраның профессор-оқытушылар құрамы, магистранттар, докторанттар және 6B03111-«Практик психологтарды даярлау» білім беру бағдарламасының студенттері қатысты.
Семинардың мақсаты - студенттердің ғылыми зерттеу мәдениетін дамыту, ғылыми жұмыстарды талдау және оларды сын тұрғысынан бағалау дағдыларын қалыптастыру.
Journal Club форматында өткен семинар барысында студенттер ғылыми үйірме аясында жүргізілген зерттеу жұмыстарының нәтижелерін ұсынып, халықаралық ғылыми конференцияларға жолданған мақалаларын таныстырды:
• Сабыр Әсел Асқарқызы (2 курс) - «Мінез акцентуациясының студенттерде көріну ерекшеліктері» (жұмыс «Қазақстандағы және әлемдегі психология: тәжірибе, үрдістер және перспективалар» халықаралық ғылыми-тәжірибелік конференциясына ұсынылған, «Тұран» университеті мен Л.Н. Гумилев ат. ЕҰУ, 17 сәуір 2026 ж.);
• Мамен Фаиза Асқарқызы (2 курс) - «Солтүстік және Оңтүстік Қазақстан тұрғындарының психологиялық әл-ауқатын салыстыру» («Фараби әлемі» студенттер мен жас ғалымдардың халықаралық ғылыми конференциясы, Әл-Фараби ат. ҚазҰУ, 7-8 сәуір 2026 ж.);
• Оспанғали Нұрай (2 курс) - Current challenges in the psychological readiness of students for professional practice (XXVI International Student Scientific Conference, Минск, Беларусь, 3 сәуір 2026 ж.);
• Ниязалиева Дария (4 курс) - «Фобиялық реакция динамикасын SUDS шкаласы негізінде зерттеу» (XXVI Международная студенческая научно-практическая конференция, Минск, 3 сәуір 2026 ж.).

Семинар аясында студенттер психология ғылымдарының докторы, профессор Ардах Ризабекқызы Ерментаеваның құрметіне арналған эссе байқауына ұсынған жұмыстарын таныстырды. Арнайы ұйымдастырылған мини-сессия барысында қатысушылар өз эсселерінің тақырыптарын, мазмұнын және негізгі идеяларын семинар қонақтарына баяндап, зерттеу мәселелерінің өзектілігін, теориялық негіздерін және авторлық көзқарастарын ашып көрсетті. Сонымен қатар, ұсынылған жұмыстар аясында ғылыми мәселелер талқыланып, студенттердің сыни ойлау және ғылыми пайым жасау дағдылары айқын көрінді.

Іс-шара соңында қатысушылар арасында ашық пікірталас ұйымдастырылып, ғылыми үйірме жұмысына белсенді қатысқан студенттер алғыс хаттармен марапатталды.

Аталған ғылыми семинар студенттердің ғылыми-зерттеу құзыреттілігін дамытуға, академиялық мәдениетті қалыптастыруға және болашақ психолог мамандардың кәсіби әлеуетін арттыруға маңызды үлес қосты.