Арнайы педагогика - педагогиканың ерекше саласы

2024 жылдың 28 қарашасында Абай атындағы ҚазҰПУ арнайы педагогика кафедрасының ұйымдастыруымен «Ашық есік күні» акциясы ұйымдастырылды. Акция ZOOM платформасы арқылы тікелей эфирде өтті. Іс-шараға Қазақстанның әр өңірінен талапкерлер, мұғалімдер, мектеп және колледж басшылары қатысты. Акцияға қатысушылар саны 114 адамды құрады.

Акция арнайы педагогика кафедрасының оқытушысы, кәсіби бағдар беру жұмысына жауапты аға оқытушы Динара Байдосованың алғысөзімен басталды. Сондай-ақ жиын барысында арнайы педагогика кафедрасының меңгерушісі Ақбота Аутаева сөз алып, университеттің жетістіктері, оның білім беру бағдарламалары туралы айтып, түлектерге болашақ мамандығын дұрыс таңдауға кеңес берді.

Арнайы педагогика тек терең білімді ғана емес, сонымен бірге мейірімділік пен жауапкершілікті қажет ететін педагогиканың ерекше саласы. Іс-шараға «Арнайы педагогика» мамандығының 1-2 курс студенттері белсене қатысты. Акцияны ұйымдастыруға және өткізуге бірінші және екінші курс студенттері үлкен көмек көрсетті. Іс-шара барысында «Арнайы педагогика» мамандығының барлық бағыттары туралы ақпараттар айтылып, презентациялар, бейнероликтер көрсетілді. Сондай-ақ оқуға түсуге байланысты қойылған сұрақтарға толыққанды жауаптар берілді. Талапкерлерді грант, қашықтықтан оқыту, оқуға арналған төлем құралдары, жеңілдіктер және білім беру бағдарламалары туралы сұрақтар қызықтырды. «Ашық есік күні» белгіленген жоспар бойынша сәтті өтті. Талапкерлерге толық байланыс ақпараты берілді. Кездесу соңында қатысушылар ұйымдастырушыларға алғыстарын білдірді.