қазақша · русский · english
   
  Негізгі бет  Жаңалықтар
18.05.2018

«Университет барасы» қазақ күресінен жарыс өтті

 

2018 жылдың 16 мамыры күні Абай атындағы Қазақ ұлттық педагогикалық университетінің 90 жылдығына орай жастар арасында қазақ күресін кеңінен насихаттау, ұлттық спорт түрімен айналысатын жас спортшылардың үлесін арттыру мақсатында Алматы қаласындағы ЖОО студенттері арасында қазақ күресінен «Университет барысы» жарысы өткізілді.


Жарыс білім ордасының күрделі жөндеуден өтіп, жаңадан тұсауы кесілген спорт кешенінде өтті.

 

Шараның ашылу салтанатында сөз сөйлеген университет ректоры Такир Балықбаев білім ордамыздың 90 жылдығы аясында ұйымдастырылып жатқан ауқымды шараларыға тоқталып, барша қатысушыларға сәттілік тіледі. Сөз кезегін алған шараның арнайы қонақтары Қазақстан Республикасы Ұлттық қауіпсіздік комитетінің құрметті қызметкері, ұлттық спорт өнерінің жанашыры, генерал-лейтенант Әділ Шаяхметов, Қазақстанның еңбек сіңірген жаттықтырушысы, қазақ күресі тұңғыш федерациясының президенті Ерғали Мұхитдинов, Алматы қаласы Мәслихатының депутаты, Университетіміздің Бақылау кеңесінің мүшесі Кенжехан Матыжанов, ҚР «Динамо» спорт қоғамы Орталық кеңесі төрағасының орынбасары, КСРО жәнге ҚР еңбек сіңірген жаттықтырушысы Марат Қошаев, ҚР еңбек сіңірген артисі Люция Тулешова спортшыларға жылы лебіздерін білдіріп, алдағы ойындарына жеңістер тіледі.

 

Жарысқа қаламыздың 20 жоғары оқу орнынан 120-дан астам спортшы қатысып, 60 кг, 74 кг және 100 кг салмақ дәрежесі бойынша күш сынасты. Додаға халықаралық санаттағы төрешілер төрелік етіп, әділ бағасын берді.

 

Жарыс қорытындысы бойынша 60 кг салмақ дәрежесі бойынша 3 орынды Қазақ спорт және туризм академиясының палуаны Мадияр Жамбыл және Абай атындағы Қазақ ұлттық педагогикалық университетінің палуаны Азамат Ықын өзара бөліссе, 2 орынды Қазақ спорт және туризм академиясының спортшысы Самат Сағатбек қанжысына байлады. Дәл осы білім ордасының палуаны Жомарт Әмірәлі жүлделі 1 орынды жеңіп алды.

 

74 кг салмақ дәрежесі бойынша «Нархоз» университетінің палуаны Болат Әбдікәрім және Қазақ спорт және туризм академиясының палуаны Алмас Тұрарбек қола медаль иегерлері атанды. Қазақ спорт және туризм академиясының екі бірдей палуаны Даваев Даврон және Бижан Елібай күміс және алтын медальді жеңіп алды.

 

100 кг салмақ дәрежесі бойынша «Қайнар» университетінің студенті Жансерік Жұмабай пен Қазақ спорт және туризм академиясының студенті Кенесары Орынбасар 3 орынға орналасса, 2 орынды Қазақ спорт және туризм академиясының палуаны Ерасыл Жанатаев жеңіп алды. Абай атындағы Қазақ ұлттық педагогикалық университетінің палуаны Мейрамбек Барах жүлделі 1 орынға орналасып, алтын медаль иегері атанды. Сонымен қатар 100 кг салмақ дәрежесінде белдескен Мейрамбек Барах Қазақ ССР-нің еңбек сіңірген жаттықтырушысы, КССРО спорт шебері Амангелді Исмагуловтың арнайы жүлдесі мен 100 000 теңге көлемінде ақшайлай сыйлық табысталды.

 

Жалпы қазақ күресінің жүлде қоры I орынға 150 000 теңгені, II орынға 100 000 теңгені, III орынға 50 000 теңгені құрады.

 

Үздік өнер көрсеткен спортшылар «Жас палуан», «Шапшаң палуан», «Жігерлі палуан», «Қажырлы палуан», «Шебер палуан» номинацияларымен және бағалы сыйлықтармен марапатталды.

 

Барлық қатысушы спортшылар мен жарыс барысын әділ бағалаған төрешілер алқасы бағалы сыйлықтар және алғысхаттармен марапатталды.

 

Шара соңында университет басшысы Такир Балықбаев қара шаңырақтың мерейлі мерекесі аясында тұңғыш рет ұйымдастырылған бұл спорттық дода алдағы уақытта дәстүрлі шараға айналатындығына үлкен сенім білдірді.

 

         

 

         

 

         

 

         

 

         

 

         

 

         

 

Тәрбие, әлеуметтік жұмыстар және

жастар саясаты жөніндегі департамент