Абай университетінің профессоры Атырау университетінің Құрметті профессоры атағына ие болды

Атырау университетінің Қазақстан және дүниежүзі тарихы кафедрасы «Халел Досмұхамедұлы және Батыс Алашорда үкіметі: жаңа тарихи деректер» тақырыбында ғылыми-әдістемелік семинар өткізді. Ғалымдар ұлт қайраткерінің өмірі мен қызметіне және Алаш өкіметінің ашылмаған ақиқатына қатысты тың деректерге толы баяндамалар жасады.

Тарихшылар бас қосқан ғылыми семинарда Алаш қозғалысының қайраткері Халел Досмұхамедұлының Батыс Алашорда үкіметі кезеңіндегі қызметі, аталған аймақтағы қозғалыстың құрылу тарихы мен рөлі туралы жаңа деректер айтылып, кеңінен талқыланды.

Университетімізден семинарға арнайы барған профессор Болат Жұмағұлов «Батыс Алаш Орданың әскери тарихы» туралы тағылымды және мазмұнды баяндамасын жасады.

Атыраулық шәкірттерге ұдайы қонақ дәрістер өткізіп, жас ғалымдарға бағыт-бағдар беріп, ғылыми жетекшілік жасап келе жатқан тарих ғылымдарының кандидаты, профессор Болат Жұмағұловқа Басқарма төрағасы-ректор Саламат Идирисов Х.Досмұхамедов атындағы Атырау университетінің «Құрметті профессоры» атағын табыстады.