Абай университеті мен Әлеуметтік инклюзивті бағдарламалар орталығы тьюторларды даярлау мәселесін талқылады

Абай атындағы ҚазҰПУ ректоры Дархан Біләлов «Әлеуметтік инклюзивті бағдарламалар орталығы» қоғамдық қорының өкілдерімен кездесті. Кездесу барысында инклюзивті білім беру кадрларын, педагог-ассистент ретінде тьюторларды даярлаудағы ынтымақтастық мәселелері, белгілі бір білім беру бағдарламалары бойынша мамандануға мүмкіндік беретін қосымша курстар өткізу, тьюторларды кәсіби қайта даярлау бағдарламасын іске асыру және олардың жұмысын әдістемелік сүйемелдеу мәселелері талқыланды, - деп хабарлайды осы жоғары оқу орнының баспасөз қызметі.

Дархан Біләлов Абай университетінің Алматы қаласы мен еліміздің білім саласының нақты мәселелерін шешуге бағытталған белсенді университет ретіндегі міндеттеріне тоқталып, мектептермен тығыз жұмыс жасау, қазіргі таңда сұранысқа ие кадрларды қайта даярлау, сондай-ақ жұмыс берушілермен және «Өрлеу» орталығымен өзара байланыс орнату, студенттердің практикасын өткізу мәселелерін атап өтті.

Ректор сондай-ақ білім алуға тең құқықты және оның мүмкіндігі шектеулі балалар үшін қолжетімділігін, оларды оқытудың қолайлы бағытын таңдауды қамтамасыз ететін инклюзивті білім беруді дамыту үшін ынтымақтастыққа дайын екендігін мәлімдеді. Психологиялық тестілеу құралдарын қолдану қажеттігі де айтылды.

«Өкінішке орай, Қазақстанда тьюторлардың көмегіне мұқтаж балалар саны артып келеді. Біз бұған дайын болуымыз керек. Әрбір бала физикалық, интеллектуалдық, әлеуметтік, эмоционалдық, тілдік және басқа да ерекшеліктеріне қарамастан, білім алып, біздің қамқорлығымызды алуы керек», - деп есептейді еліміздің жетекші педагогикалық университетінің басшысы.

«Әлеуметтік инклюзивті бағдарламалар орталығы» қоғамдық қорының президенті Салтанат Мурзалинова-Яковлева орталықтың қызметі мен педагог-тьюторларды қайта даярлау қажеттілігіне тоқталып, білікті кадрлар тапшылығын атап өтті. Оның айтуынша, Қазақстанда мұндай мамандарға деген қажеттілік жыл сайын артып келеді. Кездесу екі тарап үшін де нәтижелі өтті. Кездесуге қатысушылар осы маңызды саладағы ынтымақтастықты нығайту жөнінде пікір алмасты.

05.03.2022 ж.

Ақпарат көзі: bilimdinews.kz