Абай университеті University College London-мен ынтымақтастықты нығайтады

2023 жылдың 21 қыркүйегінде Абай университетінде Ұлыбританияның University College London Білім және қоғам факультетінің, IOE Жоғары білім беруді зерттеу орталығының директоры Татьяна Фумасолимен және University College London Білім беру институтының (IE) PhD докторанты Динара Сұлтанмен кездесу өтті.

Кездесуге Педагогика және психология институты директорының орынбасары Марфуға Абсатова, Халықаралық ынтымақтастық департаментінің директоры Жадыра Байназар, сондай-ақ Жас зерттеушілер кеңесінің төрағасы Шахислам Лайсханов пен жас ғалымдар қатысты.

University College London QS by subject «Education» рейтингінде «Педагогика» бағыты бойынша әлемде 1 орынды және QS World University ranking-2023 рейтингінде 8 орынды алады. UCL сонымен қатар элиталық университеттер қауымдастығы Russell Group құрамына кіреді.

Абай университеті сияқты UCL-дің негізгі бағыттарының бірі - педагог мамандарды даярлайды. Тараптар арасындағы диалогтың негізгі бағыттары халықаралық ынтымақтастықты кеңейту және екі мекеме арасындағы тәжірибе алмасу, бірлескен ғылыми зерттеулер мен жобаларды жүргізу, оқытушылардың біліктілігін арттыру курстарын ұйымдастыру мүмкіндіктері болды.

Сондай-ақ, UCL сарапшылары мен Абай университетінің Жас ғалымдар кеңесінің мүшелері арасында белсенді пікірталас өтті. Онда біздің зерттеушілер өз сұрақтарына жан-жақты жауаптар алып, ғылыми журналдарда жариялауға мақалалар дайындау, зерттеу әдістері, зерттеу этикасы және басқа да мәселелер бойынша құнды ұсыныстар айтылды. UCL өкілдері оқыту мен зерттеу сапасын жақсарту бойынша өз идеялары мен ұсыныстарымен бөлісті. Белсенді пікір алмасу білім берудегі инновациялық тәсілдерді дамытуға ықпал ететін жас ғалымдар мен тәжірибелі сарапшылардың тиімді өзара іс-қимылының тамаша үлгісі болды.