Орта білім беру сапасын арттыру мәселелері талқыланды

2023 жылдың 9 желтоқсанында Абай университетінде ҚР Педагогикалық ғылымдар академиясының президенті, Абай атындағы ҚазҰПУ-дың профессоры Асқарбек Құсайыновтың «Орта білім беру сапасын көтерудің ғылыми-практикалық негіздері» монографиясының тұсаукесері өтті.

Іс-шараға ҚР Оқу-ағарту министрі Ғани Бейсембаев, Қазақ ұлттық қыздар педагогикалық университетінің ректоры Гүлмира Қанай, Абай университетінің академиялық қызмет жөніндегі проректоры Бану Нарбекова, сондай-ақ, Абылай хан атындағы ҚазХҚ және ӘТУ, Әл-Фараби атындағы ҚазҰУ және Абай атындағы ҚазҰПУ өкілдері, колледж оқытушылары мен мектеп директорлары қатысты.

Іс-шара Бану Нарбекованың құттықтау сөзімен ашылды. Б.Нарбекова «Баршаға қолжетімді сапалы білім» Ұлттық баяндама жобасын жүзеге асыру аясындағы бұл шараның маңыздылығына тоқталып, білім беру стандарттары мен білім сапасын арттыруға байланысты мәселелерді шешуде орта білім беру мекемелерімен және жоғары оқу орындарының бірлесіп жұмыс істеу қажеттігін атап өтті.

Ғани Бейсембаев монография авторын құттықтай отырып, педагогикалық жоғары оқу орындарының еліміздегі барлық мектептерге педагог кадрларын даярлаудағы рөліне тоқталды. Ұлттық баяндама жобасының білім беруді дамытуға бағытталған негізгі құжат екенін айта келе, министр білім саласындағы қолжетімділік пен теңдікті қамтамасыз ету, қолайлы білім беру ортасын құру және адами капиталды дамытуды қамтитын ортақ міндеттерді жүзеге асыру жолындағы екі министрліктің бірлескен жұмысын ерекше атап өтті.

ҚР Ғылым және жоғары білім министрлігі мен Оқу-ағарту министрлігі арасында жақында қол қойылған меморандум аясында жоғары оқу орындарының ректорлары мен білім басқармаларының басшылары білім беру сапасын арттыру және жоғары білікті педагог кадрларды даярлау бойынша белсенді жұмыс жүргізіп жатқаны айтылды. Сондай-ақ бірлескен ғылыми зерттеулер жүргізіліп, білім және ғылым салаларында ынтымақтастық орнату бастамалары жүзеге асырылатын болады.

Монографияның тұсаукесер рәсімінде орта білім беру сапасын арттырудың негізгі аспектілері мен оқу үрдісін оңтайландыру әдістері талқыланды. Сондай-ақ тұрақты дамуға қол жеткізу үшін мектептер мен жоғары оқу орындары арасындағы өзара ынтымақтастық орнатудың маңыздылығы ерекше атап өтілді. Қатысушылар профессор Асқарбек Құсайыновтың монографиясының ғылыми-тәжірибелік құндылығын жоғары бағалап, бұл еңбекті республика бойынша білім беру ұйымдарында - мектептерде, педагогикалық колледждер мен жоғары оқу орындарында талқылауды ұсынды.

Қоғаммен байланыс департаменті