Абай университетінің ғалымдары толеранттылықты қазақстандық қоғамдық өмірдің негізгі құндылықтарының бірі ретінде зерттеу жобасын іске асыруда

ҚР Ғылым және жоғары білім министрлігінің 2022-2024 жылдарға арналған «Жас ғалым» гранттық қаржыландыру проектінің аясында Тарих және құқық институты саясаттану және әлеуметтік-философиялық пәндер кафедрасының аға оқытушысы Әсем Сәбитқызы «Қоғамдық дамудағы толеранттылық қағидаты: іске асыру міндеттері мен практикасы» ЖРН AP14972713 жобасын іске асыруды жалғастыруда. Жобаның ғылыми кеңесшісі - саясаттану және әлеуметтік-философиялық ғылымдар кафедрасының меңгерушісі Жомарт Симтиков.

Толеранттылықты түсіну қазіргі Қазақстанның әлеуметтік философиясы үшін өте өзекті болып табылады. Республикамыздың осы қағиданы жүзеге асырудағы оң жетістіктеріне қарамастан, толеранттылық құбылысын тұрақты түсінудің белгілі бір қажеттілігі бар, бұл, ең алдымен, уақыт сұраныстарымен және қоғамдық процестердің өзгеретін сипатымен байланысты. Толеранттылыққа сүйене отырып, кез-келген қоғам өзінің дамуының өтпелі, транзиттік кезеңдерін еңсеру мүмкіндігіне ие. Қазіргі қазақ қоғамындағы толеранттылық, қоғамның саяси, экономикалық және әлеуметтік өміріндегі дағдарыстық құбылыстардан туындаған қиындықтарға тап болып отыр. Сондықтан тәжірибеде жүзеге асырылатын толеранттылық, құқықтық нормаларға да, оны философиялық, дүниетанымдық тұрғыдан түсінуге де негізделуі керек. Жобаның жаңа идеялары мен нәтижелерін жүзеге асырудың негізгі әлеуметтік және экономикалық әсері елдің рухани жаңғыруы жағдайында адамдардың жаңа идеологиялық бағдарлар мен мағыналы өмірлік перспективаларға ие болуы болмақ.

Жобаның негізгі күтілетін нәтижесі - саяси реформалар мен Жаңа Қазақстанның құрылысы аясында, қазақстандық қоғамды түбегейлі демократияландырумен байланысты толеранттылық қағидатына жаңа түсінік пен көзқарас үшін мүмкіндіктер ашатын, білім жүйесі мен ғылыми нәтижелер ұсынылатын, монография жариялау болады. «Жас Ғалым» жобасы толеранттылықтың ғылыми түсінігін тереңдетіп, сыйластық пен өзара түсіністікке негізделген үйлесімді қоғамды қалыптастыру үшін практикалық пайда әкелуді көздейді.