Абай университеті мен Тоғызқұмалақ федерациясы өзара меморандумға қол қойды

Абай атындағы ҚазҰПУ Басқарма төрағасы-ректор Болат Тілеп Қазақстанның мемлекет және қоғам қайраткері, Астана мемлекеттік қызмет хабы басқарушы комитетінің төрағасы, Республикалық Тоғызқұмалақ федерация президенті Әлихан Байменовпен кездесті, деп хабарлайды SteppeNews ақпараттық агенттігі.

Кездесуге Республикалық Тоғызқұмалақ федерациясының вице-президенті Әкім Тұрсұн, Жетісу облыстық Тоғызқұмалақ федерациясының президенті Ришат Асқарбекұлы қатысты.

Кездесу барысында Абай университеті мен Қазақстан Республикасының Тоғызқұмалақ федерациясы арасында ынтымақтастық туралы меморандумға қол қойылды. Мақсаты - ұлттық дәстүрлерді дамытуға және насихаттауға бағытталған бірлескен іс-шараларды жүзеге асыру, осы ұлттық ойынның елімізде тиімді дамуын ынталандыру, сондай-ақ бірлескен бұқаралық спорт және мәдени бағдарламаларды мен жобаларды ұйымдастыру. Бұл ынтымақтастықтың маңызды аспектісі - ғылыми-зерттеу бағыттарын жетілдіру, жастар арасында тоғызқұмалақты кеңінен насихаттау және салауатты өмір салтын қалыптастыру.

Болат Тілеп еліміздің жетекші педагогикалық университеті үшін Тоғызқұмалақ федерациясымен ынтымақтастық орнату маңызды екеніне тоқталып, жастар арасында ұлттық құндылықтарды насихаттау Қазақстанның халықаралық беделін нығайтуға ықпал етіп қана қоймай, оның мәдени ықпалын кеңейтетінін атап өтті.

Кездесу барысында Қазақстанда тоғызқұмалақты белсенді дамытуға және кеңінен насихаттауға бағытталған маңызды мәселелер қаралды. Сондай-ақ еліміздің мәдени мұрасына, оның ішінде қазақтың дәстүрлі ұлттық ойындарына қоғамның назарын аудару, оларды ынталандыру және қолдау мақсатында ұлттық құндылықтарды жастар арасында кеңінен насихаттауға бағытталған бірлескен мәдени іс-шараларды ұйымдастыру мәселелері де талқыланды.

Кездесу соңында тараптар жастар арасында ұлттық ойынды насихаттау және мәдени іс-шараларды ұйымдастыру азаматтардың салауатты өмір салты мен патриотизмді қалыптастыруға ықпал ететініне сенім білдірді.

30.05.2024

Ақпарат көзі: steppenews.kz