Бастауыш сынып оқушыларының оқырмандық сауаттылығын қалыптастыру

2024 жылдың 24-25 маусымы аралығында Абай атындағы ҚазҰПУ Педагогика және психология институты, бастауыш білім беру кафедрасының 1 курс докторанты Алуа Ибрайханова Алматы қаласындағы №14 кітапханада бастауыш сынып оқушыларымен «Жазғы демалысқа жақсы кітаппен» тақырыбында экскурсия жүргізді.

Экскурсияның мақсаты - мұғалім-бала-ата-ана ынтымақтастығы негізінде бастауыш сынып оқушыларының оқырмандық сауаттылығын қалыптастыру, жазғы демалыс кезіндегі бос уақыттарын тиімді өткізу.

Экскурсия барысында кітапханаға келген кішкентай оқырмандар мен ата-аналарға кітап әлеміне саяхат ұйымдастырылды. Саяхат кезінде кітапханаға жаңадан түскен балалар әдебиеттерінен жиналған «Кітап әлеміне саяхат» атты кітап көрмесі таныстырылды.

Экскурсия кезінде балаларға озық көркем шығармалар насихаттала отырып, жазғы демалыс кезінде кітап оқуға кеңес берілді. Сонымен қатар, бастауыш сынып оқушыларына кітап таңдау бағытында қолдаулар көрсетілді.

Экскурсия соңында «Өзің оқы және өзгеге кітап сыйла» деп аталатын қызықты кітаптар тізімі жасалып, оларды кішкентай оқырмандар бір-біріне ұсынды. Балаларға қызықты ойындар ойнатылып, оқушыларды «Кітап калейдоскопы» танымдық клубына тарту мақсатында жарнама жасалды.