Абай университетінде студенттік клубтардың жәрмеңкесі өтті

Бүгін, 2024 жылдың 10 қыркүйегінде Абай атындағы ҚазҰПУ-да студенттік клубтардың жәрмеңкесі өтті. Жәрмеңкеге 35 шығармашылық клуб және 2000-нан астам студент қатысты.

Іс-шараның негізгі мақсаты - дарынды және бәсекеге қабілетті жастардың университет өміріне бейімделуіне ықпал ету, оларды студенттік клубтардың қызметімен таныстыру, клуб құрамына қосылғысы келетін білім алушылар үшін жаңа мүмкіндіктер ұсыну, сонымен қатар клубтардың шығармашылық жобалары мен жетістіктерін көрсету болды. Жәрмеңке университет факультеттерінің студенттері үшін тәжірибе алмасуға, өзара байланыс орнатуға ықпал етіп, тек академиялық салада ғана емес, шығармашылық және әлеуметтік салаларда бірлесіп даму үшін өз пікірлестерін табуға мүмкіндік берді.

Іс-шарада университет ректоры Болат Тілеп университетте мәдени және зияткерлік ортаны қалыптастырудағы студенттік клубтардың атқаратын рөлі мен маңыздылығына тоқталды. Сондай-ақ ол мұндай клубтар студенттердің бойында көшбасшылық, командалық дағдыларды дамытып қана қоймай, белсенді азаматтық ұстанымды қалыптастыруға ықпал ететінін атап өтті. Ректор студенттерді клубтардың жұмыстарына қатысумен шектелмей, жаңа идеялар мен бастамалар ұсынып, олардың дамуына белсенді үлес қосуға шақырды. Бұл жастар арасында рухани және адамгершілік құндылықтарды нығайтып, университет қауымдастығының одан әрі дамуына ықпал ететін жаңа бастамалар мен бірегей жобаларды жасауға көмектеседі.

Жәрмеңке барысында қатысушылар университеттің клубтық өмірінің алуан түрлілігімен, тыныс-тіршілігімен жақынырақ танысып, өз жобаларын ұсынуға және өз қатарына жаңа студенттерді тартуға мүмкіндік алды. Студенттер өнер, ғылым, спорт және еріктілік қызметтермен қатар, оларды қызықтыратын шығармашылық бағыттар туралы көбірек біле алды.

Абай университеті білім алушылардың көшбасшылық қасиеттерін дамытуға және әрбір студенттің әлеуетін ашуға ықпал етіп, белсенді студенттер қауымына қолдау көрсетуді жалғастыруда.