Абай университетінде Кітапханашылар күні тойланды

Абай атындағы ҚазҰПУ Ғылыми кітапханасында 24 қазан - Кітапханашылар күніне орай мерекелік салтанатты іс-шара өтті. Шараға Абай университетінің зерттеу қызметі және инновация жөніндегі проректоры Ертай Сұлтан, профессор-оқытушылар құрамы, кітапханашылар және студенттер қатысты. Шарада кітапханашылардың жыл бойы атқарылған жұмыстары жөнінде дайындалған бейнеролик, «Альманахъ», «Лантар Books», «Alash Book», «Kemel» сынды кітап баспаларының жәрмеңкесі өткізіліп, bookсrosing және жаңа түскен басылымдар көрмесі, педагогикалық ұжымның еңбектері көпшілік назарына ұсынылды.

Іс-шара аясында Абай университеті шығыс филологиясы және аударма кафедрасының аға оқытушысы Рая Оразбаеваның «Араб тілінің практикалық курсы» кітабының тұсаукесер рәсімі өтті. Сондай-ақ педагогика ғылымдарының кандидаты, доцент Бағдат Қосановпен кездесу-бенефисі өткізілді. Бағдат Қосанов студенттер мен қатысушыларға өзінің ғылымдағы, мансап жолындағы қызықтары мен ерекше есте қалатын сәттері туралы баяндап берді. Іс-шара барысында «Альманахъ» баспа үйінің электрондық кітапхана жүйесі» вебинар ұйымдастырылды.

Шара Ғылыми кітапхана директоры Нұргүл Имансыдықованың баяндамасымен жалғасын тапты. Ол  өз баяндамасында қазіргі кітапхананың жай-күйі туралы жан-жақты баяндады. Сондай іс-шара барысында жыл бойында айырықша еңбегімен көзге түскен кітапхана мамандары ҚР Кітапханашылар одағының «Қазақстанның құрметті кітапханашысы», «Ардагер кітапханашы» төсбелгісімен, «Алғыс хаттармен» және университеттің «Құрмет грамоталарымен», «Жыл маманы», «Айрықша еңбектері үшін», «Жас маман» сертификаттарымен марапаттады. Мерекелік шарада кітапхана оқырмандары да марапатсыз қалған жоқ. Олар Абай университеті Ғылыми кітапханасы атынан «Кітапхана жанашыры», «Жыл авторы», «Құрметті оқырман», «Үздік оқырман» номинациялары бойынша марапатталды. Шара соңы Филология, Өнер, Физика, математика және информатика, Жаратылыстану және география факультеттері студенттерінің дайындаған концерттік бағдарламасына ұласты.