«Көңілді зоология – 2024» оқушылардың дәстүрлі қалалық олимпиадасы басталды

Жыл сайын Алматы зоологиялық саябағы базасында саябақ қызметкерлері Абай атындағы ҚазҰПУ педагогикалық ұжымымен (Биология кафедрасының мұғалімдері Батырова К.И., Бекенова Н.А., Шыныбекова Ш.С.) бірлесе отырып мектеп оқушыларының қалалық зоологиялық олимпиадасын өткізеді. Іс-шара оқушылардың шығармашылық қабілеттерін және ғылыми (зерттеу) іс-әрекетке қызығушылығын анықтау және дамыту, биология ғылымын және биологиялық білім беруді насихаттау мақсатында өткізіледі.

2024 жылдың 29 қазаны мен 3 қарашасы аралығында аталмыш шара Алматы зообағының 86 жылдығына орай «Көңілді зоология» атауымен мектептің 7-8 сынып оқушылары үшін өткізілуде. Тапсырмалар кешеніне теориялық және практикалық мазмұндағы тапсырмалар кіреді. Мұндай мәселелерді шешу үшін қатысушылардан жануарлардың құрылысы мен тіршілік әрекетінің, мінез-құлқы мен өмір салты ерекшеліктері туралы негізгі білімдері, тәжірибелік тапсырмаларды шешудегі зейінділік, тапқырлық және логикалық қасиеттері қажет. Сонымен қатар әртүрлі жүйелік топтағы жануарлардың негізгі белгілерін танып, белгілей білу, ғылыми аппаратурамен (микроскопиялық әдіс) зерттеу жұмысының бастапқы дағдыларын және өз жұмысын талдауды қамтамасыз ету қажет болады.